Valdís bætti sig um 13 högg og komst áfram í Frakklandi
Valdís Þóra Jónsdóttir GL lék í dag frábært golf á Opna franska mótinu sem er hluti af Evrópumótaröð kvenna í golfi. Valdís kom inn á 66 höggum og flaug í gegnum niðurskurðinn þrátt fyrir slaka byrjun.
Valdís endaði fyrsta hring mótsins hræðilega og var á 8 höggum yfir pari þegar komið var að hring dagsins.
Í dag sneri hún við taflinu, fékk sex fugla og einn skolla og kom inn á 66 höggum. Einungis Solheim keppandinn Nelly Korda lék á betra skori en Valdís á öðrum keppnisdegi.
Fyrir þriðja hringinn sem fer fram á laugardaginn er Valdís jöfn í 37. sæti á 3 höggum yfir pari í heildina. Alls eru leiknir fjórir hringir í mótinu.
