200 þúsund dollarar undir á fyrstu holunni í einvígi Woods og Mickelson
Auk þess að keppa um níu milljónir dollara munu þeir Tiger Woods og Phil Mickelson taka þátt í ýmsum hliðarkeppnum þegar einvígi þeirra fer fram þann 23. nóvember næstkomandi.
Á blaðamannafundi þeirra í dag stakk Mickelson upp á veðmáli strax á fyrstu holu.
„Ég er búinn að hugsa töluvert um þetta og það eru kaflar á þessum velli sem eru frábærir fyrir litlar keppnir,“ sagði Mickelson. „Mér líður eins og fyrsta holan henti mér mjög vel og ég trúi því, í raun er ég til í að veðja 100.000 dollurum á að ég fái fugl á fyrstu holu. Mér líður það vel fyrir þetta einvígi.“
Mickelson hélt svo aðeins áfram: „Þú þarft ekki að taka þessu veðmáli, alls ekki, en ég vildi bara koma þessu á framfæri.“
Fyrsta holan á Shadow Greek vellinum er tæplega 380 metra löng par 4 hola.
„Bíddu við.. Heldur þú að þú getir fengið fugl á fyrstu holunni?“ sagði Woods við Mickelson.
Mickelson svaraði þá: „Ég veit að ég mun fá fugl á fyrstu holunni.“
„Tvöfaldaðu upphæðina,“ sagði Woods.
„Sáuð þið hvernig ég náði að veiða hann í þetta veðmál?“ sagði Mickelson brosandi. „Geggjað, 200.000 dollarar fyrir fugl á fyrstu holu.“