Ágúst varð klúbbmeistari í Svíþjóð
Keiliskylfingurinn Ágúst Ársælsson varð klúbbmeistari hjá Hulta golfklúbbnum í Svíþjóð en leiknar voru 54 holur um síðustu helgi. Ágúst lék á +3 og fyrir sigurinn var honum hent út í tjörnina við 9. flötina en það er gömul hefð í klúbbnum.
Ágúst lék hringina þrjá á 69-75-75. Hann háði harða keppni við tvo aðra kylfinga, m.a. Mats Kinnbergs, fyrirliða hjá eldri landsliði Svía.
Ágúst er með +2,7 í forgjöf og hefur alla tíð verið Keilismaður en á þó að baki einn meistaratitil hjá Golfklúbbi Vatnsleysustrandar. Hann hefur stundum farið út á sumrin og gerðist félagi í sumar í þessum klúbbi sem er staðsettur rétt utan Gautaborgar í Bollebyggd.
„Þetta var gaman að fá að fjúkja í tjörnina. Það er flott að spila golf hérna í blíðunni á sumrin,“ sagði Ágúst í stuttu spjalli við kylfing.is.
Hér má sjá þegar Ágústi var hent út í tjörnina.