Brooks Koepka valinn kylfingur ársins á PGA mótaröðinni
Bandaríkjamaðurinn Brooks Koepka var valinn kylfingur ársins á PGA mótaröðinni í dag, þriðjudag. Að valinu stóðu kylfingar PGA mótaraðarinnar. Það ætti ekki að koma mörgum á óvart enda var Koepka frábær á árinu og er nú kominn í þriðja sæti heimslistans.
Á árinu sigraði Koepka bæði á Opna bandaríska mótinu og PGA meistaramótinu og hefur hann nú sigrað á þremur risamótum á rúmu ári. Með sigrinum á Opna bandaríska mótinu varð Koepka sá fyrsti frá árinu 1989 til að verja titil sinn í mótinu.
Þá endaði Koepka fjórum sinnum í topp-10 á PGA mótaröðinni á tímabilinu og endaði í 9. sæti stigalistans.
Koepka var valinn fram yfir kylfinga á borð við Bryson DeChambeau, Dustin Johnson, Francesco Molinari, Justin Rose og Justin Thomas.
