DeChambeau braut dræverinn á fyrsta keppnisdegi PGA meistaramótsins
Bryson DeChambeau lenti í ansi skondnu atviki á fyrsta keppnisdegi PGA meistaramótsins sem fór fram í gær, fimmtudag.
DeChambeau var nýbúinn að slá fínt teighögg á 7. holu TPC Harding Park vallarins og var að ná í tíið sitt þegar dræverinn gaf sig. DeChambeau virtist ekki hafa náð að setja mikinn þunga á dræverinn þegar hann brotnaði og því líklegt að hann hafi brotið hann í umræddu teighöggi.
Liðsmenn DeChambeau voru ekki lengi að ná í nýtt skaft og var Bandaríkjamaðurinn því kominn með dræver í pokann stuttu seinna.
DeChambeau spilaði fyrsta hring PGA meistaramótsins á 2 höggum undir pari og er jafn Tiger Woods og fleiri góðum kylfingum í 20. sæti.