Ég hef náð ágætum árangri hér
Bandaríkjamaðurinn Tiger Woods hefur ekki sigrað á risamóti frá árinu 2008 þegar hann fagnaði sigri á Opna bandaríska. Eftir vel heppnaða aðgerð á baki í fyrra er hann hins vegar aftur orðinn einn heitasti kylfingur heims og var hann í toppbaráttunni bæði á Opna mótinu og PGA meistaramótinu á síðasta ári áður en hann sigraði á Tour Championship.
Woods er því nokkuð kokhraustur fyrir Masters mótið sem hefst á fimmtudaginn.
„Mér líður eins og ég geti unnið aftur,“ sagði hinn 43 ára gamli Woods. „Ég hef sýnt að ég get það. Ég kom mér í færi til að vinna tvö síðustu risamót ársins í fyrra.
Ég var með forystuna á Opna mótinu og ég var í toppbaráttunni á PGA meistaramótinu. Ég þarf bara að komast hjá því að kasta frá mér höggum en mér tókst það á Tour Championship mótinu á East Lake.
Ég veit að ég get spilað þennan völl vel. Ég hef náð ágætum árangri hér.“
Woods er einn sigursælasti kylfingur í sögu Masters mótsins með fjóra sigra. Fyrsti sigurinn kom árið 1997 þegar hann varð 12 höggum á undan Tom Kite. Síðan þá bætti hann við sig titlum árin 2001, 2002 og 2005.