Evrópumótaröð karla: Catlin sigurvegari í annað sinn í september
Það má með sanni segja að september hafi reynst Bandaríkjamanninum John Catlin góður en í dag tryggði hann sér annan sigur sinn á Evrópumótaröð karla og er þetta annar sigur hans í mánuðinum.
Lokadagur Dubai Duty Free Irish Open mótsins var leikinn í dag og var það Englendingurinn Aaron Rai sem var í forystu fyrir daginn. Á meðan Rai lék á pari vallar átti Catlin næstbesta hring mótsins og kom sér tveimur höggum á undan Rai.
Catlin lék á 64 höggum í dag eða sjö höggum undir pari, þar sem hann fékk meðal annars þrjá fugla á síðustu fjórum holunum. Hann endaði mótið á 10 höggum undir pari, tveimur höggum á undan Rai.
Fyrr í mánuðinum fagnaði Catlin sigri á Andalucia Masters mótinu og var það fyrsti sigur hans á mótaröðinni.