Evrópumótaröð karla: Pavan efstur þegar leik var frestað
Evrópumótaröð karla snéri til baka í dag eftir nokkurt frí frá venjulegri dagskrá þegar BMW International mótið hófst í Þýskalandi. Vegna myrkurs náðu ekki allir kylfingar að ljúka leik í dag en það er Ítalinn Andrea Pavan sem er í forystu eftir daginn.
Pavan var einn af þeim kylfingum sem náði að ljúka leik. Hann kom í hús á 66 höggum, eða sex höggum undir pari. Hann fékk einn örn í dag, fimm fugla, einn skolla og restina pör.
Jafnir í öðru sæti á fimm höggum undir pari eru þeir Oliver Wilson og heimamaðurinn Martin Kaymer. Þeir náðu einnig að ljúka leik í dag.
Síðustu menn munu ljúka leik við fyrsta hringinn í fyrramálið áður en annar hringurinn hefst.