Fyrsti sigur Frittelli á PGA mótaröðinni kom á John Deere Classic
Dylan Frittelli sigraði á John Deere Classic mótinu sem fór fram á PGA mótaröðinni um helgina eftir frábæra spilamennsku alla fjóra dagana. Þetta var fyrsti sigur Frittelli á mótaröðinni en hann hefur tvisvar fagnað sigri á Evrópumótaröðinni.
Frittelli lék hringina fjóra í mótinu á 21 höggi undir pari en hann var á 13 höggum undir pari síðustu tvo dagana. Svo fór að lokum að hann endaði tveimur höggum á undan Russell Henley sem varð annar á 19 höggum undir pari.
Andrew Landry varð í þriðja sæti í mótinu á 18 höggum undir pari, höggi á undan þeim Collin Morikawa og Chris Stroud.
Frittelli hefur nú sigrað á öllum stærstu mótaröðum heims en auk þess að sigra á PGA- og Evrópumótaröðinni hefur hann einnig sigrað á asísku mótaröðinni.