Grace sigraði á SA Open eftir magnaðan lokahring
Heimaðurinn Branden Grace sigraði í dag á SA Open mótinu sem fór fram á Evrópumótaröð karla í Suður-Afríku. Grace lék lokahring mótsins á 9 höggum undir pari og fagnaði að lokum þriggja högga sigri.
Fyrir lokahringinn var Grace þremur höggum á eftir risameistaranum Louis Oosthuizen sem hafði titil að verja í mótinu. Oosthuizen gerði í raun engin mistök á lokahringnum, fór holu í höggi og tapaði ekki höggi en þurfti samt sem áður að sætta sig við annað sætið í mótinu á 18 höggum undir pari.
Grace átti ótrúlegan kafla á lokahringnum frá 3.-14. holu þar sem hann lék holurnar 12 á 10 höggum undir pari. Fyrir þriðju holu var Grace á höggi yfir pari en hann endaði hringinn á 9 höggum undir pari og á 21 höggi undir pari í heildina. Grace hefur nú sigrað á 9 mótum á Evrópumótaröðinni.
Englendingurinn Marcus Armitage endaði í 3. sæti á 16 höggum undir pari, tveimur höggum á eftir Oosthuizen og 5 á eftir Grace.