Guðmundur Ágúst sigraði aftur á Nordic Golf mótaröðinni
Guðmundur Ágúst Kristjánsson, GR, sigraði í dag á PGA Championship mótinu sem fór fram á Nordic Golf mótaröðinni dagana 13.-15. júní.
Fyrir lokahringinn í mótinu var Guðmundur Ágúst í forystu og lék hann hringinn í dag á einu höggi undir pari. Hann endaði því jafn Dananum Christian Bæch Christiansen í efsta sæti á samtals 9 höggum undir pari.
Bráðabana þurfti til að knýja fram úrslit en eftir að þrjár holur höfðu verið leiknar í bráðabananum þurfti að fresta leik vegna veðurs. Ekki tókst að klára bráðabanann og deildu því Guðmundur og Christian efsta sætinu.
Guðmundur Ágúst hefur nú sigrað á tveimur mótum á Nordic Golf mótaröðinni á þessu tímabili og færist því skrefi nær þátttökurétti á Áskorendamótaröðinni. Þeir kylfingar sem sigra á þremur mótum á mótaröðinni öðlast sjálfkrafa þátttökurétt á Áskorendamótaröðinni en þar að auki er Guðmundur meðal fimm efstu á stigalista mótaraðarinnar.
Líkt og Kylfingur greindi frá fyrr í dag endaði Haraldur Franklín Magnús jafn í 8. sæti í mótinu á samtals 6 höggum undir pari eftir góðan lokahring sem hann lék á 68 höggum eða þremur höggum undir pari.
Andri Þór Björnsson náði sér ekki á strik í dag en fyrir daginn var hann jafn í 7. sæti á samtals fimm höggum undir pari. Hringinn í dag lék hann á 75 höggum, eða fjórum höggum yfir pari. Hann lýkur því leik jafn í 35. sæti á samtals einu höggi undir pari.
Axel Bóasson og Aron Bergsson voru einnig að meðal keppenda en þeir komust ekki í gegnum niðurskurðinn.