Guðrún gaf eftir á þriðja degi Jabra Ladies Open
Lokadagur Jabra Ladies Open mótsins reyndist Guðrúnu Brá Björgvinsdóttur erfiður en mótið er hluti af Evrópumótaröð kvenna. Tveir slæmir kaflar reyndust dýrkeyptir.
Í tvö skipti á hringnum í dag kom þriggja holu kafli þar sem Guðrún fékk tvo skolla og einn skramba. Á móti náði hún aðeins í einn fugl og endaði því daginn á 78 höggum, eða sjö höggum yfir pari.
Guðrún endaði mótið jöfn í 59. sæti á samtals 12 höggum yfir pari. Á fimmtudaginn hefst Scandinavian Mixed mótið og er Guðrún skráð til leiks. Hún er aftur á móti sem stendur í fimmta sæti á biðlista. Það mun því koma í ljós í vikunni hvort hún komist inn í mótið eða ekki.