Homa sigraði í Kaliforníu
Max Homa sigraði á Fortinet Championship sem lauk í Kaliforníu í nótt. Homa lék samtals á 19 höggum undir pari og endaði höggi á undan Maverick McNealy. Þetta var þriðji sigur Homa á PGA mótaröðinni á ferlinum.
Homa var frábær á lokahringnum sem hann lék á 65 höggum. McNealy fylgdi honum fast á eftir en tvöfaldur skolli á 17. braut gerði vonir hans að engu jafnvel þótt hann hafi náð erni á síðustu braut dagsins.
Phil Mickelson sem var í toppbaráttunni fyrir lokahringinn náði sér engan veginn á strik og lék á þremur höggum yfir pari. Við það féll hann niður í 36. sæti.
