Ilonen búinn að leggja kylfurnar á hilluna
Fimmfaldi sigurvegari Evrópumótaraðarinnar, Mikko Ilonen, tilkynnti í vikunni að hann væri hættur í keppnisgolfi.
Ilonen, sem er einn sigursælasti finnski karlkylfingur frá upphafi, er orðinn 39 ára gamall og var dottinn niður í 391. sæti heimslistans þegar hann ákvað að kalla þetta gott.
„Síðustu mánuði hef ég verið að velta því fyrir mér hvort hinn kappsfulli Mikko væri enn til staðar,“ sagði Ilonen á Instagram síðu sinni. „Eftir að hafa horft á þetta frá öllum mögulegum sjónarhornum hef ég komist að þeirri niðurstöðu að hætta keppnisgolfi. Ég er sannfærður um að það sé rétt ákvörðun.“
Ilonen sigraði á fimm mótum á Evrópumótaröð karla og var á sínum tíma fyrstur Finna til að vinna á mótaröðinni. Þá endaði hann í 9. sæti á Opna mótinu árið 2001 og náði sínum besta árangri á risamóti árið 2014 þegar hann endaði í 7. sæti á PGA meistaramótinu.
Sigrar Ilonen á Evrópumótaröð karla:
2007: Enjoy Jakarta Astro Indonesia Open
2007: Scandinavian Masters
2013: Nordea Masters
2014: Irish Open
2014: Volvo World Match Play Championship
