Jóhanna Lea fór holu í höggi
Þær voru gríðarlega erfiðar aðstæðurnar á öðrum degi Íslandsmóts unglinga í Leirdal, brjálað rok, völlurinn þurr og flatirnar hraðar. Það breytti því ekki að GR-ingurinn Jóhanna Lea Lúðvíksdóttir spilaði frábært golf, sérstaklega á seinni níu holunum.
Á þrettándu holu voru aðstæður þannig að stífur hliðar mótvindur gerði kylfingum erfitt fyrir auk þess sem holustaðsetningin vægast sagt krefjandi. Á þessum degi var meðalskorið á holunni 4,29 högg, næst erfiðasta hola vallarins. Jóanna Lea mældi 128 metra í pinna, sló með sjö járni hið fullkomna golfhögg og fór holu í höggi.
Jóhanna fylgdi draumahögginu eftir með því að landa Íslandsmeistaratitlinum í flokki 17-18 ára. Góð vika hjá stúlkunni.