Johnson ekki mikið að spá í reglubreytingunum
Líkt og fjallað hefur verið um hér á Kylfingi urðu víðtækar breytingar á golfreglunum um áramótin og tóku þau því gildi í fyrsta móti ársins á PGA mótaröðinni dagana 3.-6. janúar.
Einn besti kylfingur heims, Dustin Johnson, virtist þó ekki kippa sér mikið upp við það og kom það í ljós á blaðamannafundi fyrir mótið þegar hann var spurður út í breytingarnar.
„Ég var einmitt að skoða þetta [í fyrsta skiptið] í svona mínútu áður en ég kom hingað," sagði Johnson við blaðamenn. „Þeir eru með stórt plaggat í búningsklefanum.“
Þrátt fyrir víti á 2. hring kom vanþekking Johnson ekki svo mikið að sök í fyrsta móti ársins þar sem hann endaði jafn í 4. sæti. Samkvæmt kylfusveini hans ætla þeir þó að fara saman yfir helstu breytingarnar á næstu dögum.
