Laporta leiðir í Abú Dabí
Ítalinn Francesco Laporta leiðir með einu höggi eftir tvo hringi á Abu Dhabi HSBC meistaramótinu sem fer fram á Evrópumótaröð karla í golfi.
Laporta fékk fimm fugla í röð á síðustu holum dagsins og kom inn á 63 höggum. Þetta er fyrsta tímabil kappans á Evrópumótaröðinni en hann endaði í efsta sæti á stigalista Áskorendamótaraðarinnar í fyrra.
Samtals er Laporta á 10 höggum undir pari, höggi á undan fyrrum Ryder spilurunum Rafa Cabrera Bello og Matt Fitzpatrick.
Spánverjinn Sergio Garcia er svo á 8 höggum undir pari og deilir fjórða sætinu með Kínverjanum Haotong Li og Ítalanum Renato Paratore sem leiddi eftir fyrsta keppnisdag.
Besti kylfingur heims, Brooks Koepka, lék á 75 höggum í dag og datt niður í 35. sæti í mótinu á 3 höggum undir pari í heildina.