LPGA: Efsta kona heimslistans og sú danska jafnar á toppnum
Það eru þær Jin-Young Ko, efsta kona heimslistans, og hin danska, Nicole Broch Larsen sem deila efsta sætinu þegar einum hring er ólokið á CP Women's Open sem fram fer á LPGA mótaröðinni.
Þær stöllur eru báðar á 18 höggum undir pari, tveimur höggum á undan Brooke M. Henderson, sem á titil að verja.
Ko átti besta hring gærdagsins er hún kom í hús á 65 höggum, eða sjö höggum undir pari. Hún fékk sjö fugla og restina pör. Larsen er búin að leika alla hringi mótsins á 66 höggum, eða sex höggum undir pari. Í gær fékk hún einn skolla, fimm fugla, örn og restina pör.
Henderson lék á 65 höggum líkt og Ko og kom sér þannig nær efsta sætinu. Hún er samtals á 16 höggum undir pari, þremur höggum á undan næsta kylfingi.
Hérna má sjá stöðuna í mótinu.
Nicole Broch Larsen.