LPGA: Henderson fór holu í höggi nokkrum mínútum áður en fresta þurfti leik
Fyrsti hringur Meijer LPGA Classic mótsins fór fram á fimmtudaginn á LPGA mótaröðinni í golfi. Jenny Shin og Katherine Perry eru í forystu á 6 höggum undir pari en um helmingur keppenda náði ekki að klára fyrsta hringinn áður en fresta þurfti leik.
Ein þeirra sem náði ekki að klára fyrsta hringinn var hin kanadíska Brooke M. Henderson. Hún hefur líklega ekki verið sátt með að þurfa hætta leik enda var hún komin 4 högg undir par eftir fyrstu sex holurnar og nýbúin að fara holu í höggi. Henderson fer út snemma í dag til að klára fyrsta hringinn en hún er jöfn í 4. sæti.
Eins og áður hefur komið fram eru þær Shin og Perry í forystu á 6 höggum undir pari. Höggi á eftir þeim er Mariajo Uribe ein í þriðja sæti.