Myndband: Hélt að völlurinn væri par 72
Bandaríkjamaðurinn John Catlin hefur verið í miklu stuði á Evrópumótaröð karla í golfi undanfarna 8 mánuði. Á þeim tíma hefur hann sigrað á þremur mótum á mótaröðinni og er í toppbaráttunni á móti vikunnar eftir frábæran fyrsta hring.
Catlin var á tímabili á 10 höggum undir pari í dag á Tenerife Open og voru einhverjir farnir að velta því fyrir sér hvort Catlin yrði annar kylfingurinn í sögu mótaraðarinnar til að spila á undir 60 höggum.
Endasprettur Catlin var hins vegar ekki nógu góður en í stað þess að bæta við sig fuglum fékk Bandaríkjamaðurinn tvo skolla og endaði daginn á 8 höggum undir pari eða 63 höggum. Eftir fyrsta hringinn er Catlin einu höggi á eftir Thorbjörn Olesen sem er í forystu.
„Ég áttaði mig reyndar ekki á því að völlurinn væri par 71.. Ég hélt að hann væri par 72 þannig að ég hélt að ég þyrfti þrjá í viðbót,“ sagði Catlin aðspurður hvort hann væri farinn að hugsa um 59 höggin. „Ég kom mér í mörg góð færi og er smá svekktur að hafa endað á tveimur skollum á lokaholunum. Ég spilaði svo vel þannig að það er svekkjandi að gefa frá sér tvö högg en þetta er samt löng vika, það eru þrír dagar eftir.“