Myndband: Leik frestað í Portúgal
Vegna veðurs var ekki hægt að klára annan hringinn í dag á Opna portúgalska mótinu sem haldið er á Evrópu- og Áskorendamótaröðinni í golfi. Mikill vindur gerði kylfingum erfitt fyrir auk rigningar en hér neðst í fréttinni má sjá hvernig ástandið var á tímabili.
Tveir íslenskir kylfingar eru í eldlínunni í mótinu en það eru þeir Guðmundur Ágúst Kristjánsson og Haraldur Franklín Magnús, báðir úr GR.
Guðmundur byrjaði daginn í 8. sæti á 3 höggum undir pari en hann náði ekki að spila nema eina og hálfa holu í dag og því nóg golf eftir hjá honum um helgina. Blaðamaður Kylfings hefur ekki heimildir fyrir því á hvaða skori Guðmundur var á fyrstu holunni en GR-ingurinn sagðist sjaldan hafa spilað í verra veðri.
Haraldur Franklín fór fyrr af stað í dag og náði að klára 15 holur áður en leik var frestað til morguns. Haraldur er á 5 höggum yfir pari og jafn í 100. sæti, þremur höggum frá niðurskurðarlínunni eins og staðan er núna. Takist honum að klára hringinn vel á morgun ætti hann að eiga möguleika á að komast áfram.
Skorkort Haralds.
Þrátt fyrir þessa frestun er enn stefnt að því að mótið klárist á sunnudaginn en alls verða leiknir fjórir hringir.