Ólafía alveg við niðurskurðarlínuna

Ólafía Þórunn Kristinsdóttir, GR, er búin með tvo hringi á Symetra Classic mótinu sem fram fer á Symetra mótaröðinni í golfi. Eftir hringina tvo er Ólafía á 5 höggum yfir pari og alveg við niðurskurðarlínuna í mótinu.

Ólafía var á tveimur höggum yfir pari eftir fyrri hringinn en hún hóf leik á 10. teig í dag. Alls fékk hún sex skolla og þrjá fugla á hring dagsins en skolli á 9. holu, hennar síðustu í dag, gæti reynst henni dýrkeyptur.

Skorkort Ólafíu.

Þegar fréttin er skrifuð er Ólafía jöfn í 60. sæti og á öllum líkindum á leið í gegnum niðurskurðinn. Kylfingur mun fylgjast með því næstu klukkutíma þegar síðustu kylfingarnir koma inn hvort Ólafía komist áfram og greina frá því þegar það er ljóst.

Uppfært:

Ólafía komst í gegnum niðurskurðinn og er í 57. sæti fyrir lokahring mótsins sem fer fram á morgun, föstudag.

Hér er hægt að sjá stöðuna í mótinu.

Ísak Jasonarson
[email protected]