Örninn Taylor
Örninn Taylor

Fréttir

Segist hægja sérstaklega á leikhraða til að fá dómara á staðinn
Brooks Koepka.
Fimmtudagur 7. febrúar 2019 kl. 22:41

Segist hægja sérstaklega á leikhraða til að fá dómara á staðinn

Brooks Koepka hefur verið iðinn við kolann undanfarnar vikur í viðtölum við hina og þessa miðla en hann hefur jafnan látið ýmislegt flakka.

Kylfingur greindi frá því í síðustu viku að Koepka fyndist vandræðalegt hversu lengi kylfingar á borð við Bryson DeChambeau væru að spila golf og þá deildi hann einnig skoðun sinni um Sergio Garcia eftir að hann var rekinn úr Saudi International mótinu.

Koepka mætti til Danny Kanell á Sirius XM útvarpstöðinni á dögunum og var þá aftur spurður út í hægan leikhraða á stærstu mótaröðum heims. Aðspurður hvort hægur leikhraði hefði einhver áhrif á hans golfleik kom Koepka, sem er í öðru sæti heimslistans, með ansi áhugaverð ummæli.

„Það er örugglega slæmt að ég skuli segja þetta en ég er með öðruvísi nálgun. Ég reyni að hægja enn meira á spilinu, sem er hluti af vandamálinu.“

„Sumir af þessum gaurum eru svo hægir að ég tek mér auka tíma til að slá. Ég fer á klósettið þó ég þurfi þess ekki og slaka á í fimm mínútur þannig að við förum á klukkuna [sem þýðir að dómari mætir og tekur tímann á hollinu] og þá erum við farnir að spila á mínum hraða.“

„Þetta er líklega ekki það rétta í stöðunni en þetta er það sem ég geri.“

Brot af viðtalinu við Koepka má sjá hér fyrir neðan.

Ísak Jasonarson
isak@vf.is