Sigurður jafnaði vallarmetið í Eyjum
Sigurður Bjarki Blumenstein, Golfklúbbi Reykjavíkur jafnaði vallarmet Haraldar Franklín á þriðja hring á Íslandsmótinu í Eyjum. Sigurður lék á átta höggum undir pari, 62 höggum og var í miklu stuði.
Sigurður sem sigraði á sínu fyrsta stigamóti í sumar fékk sex fugla á fyrri níu og setti niður langt pútt á 9. flöt fyrir 29 höggum. Hann gaf ekkert eftir á seinni níu holunum sem eru mun erfiðari og fékk fugla á 15. og 16. braut en tapaði svo höggi á 17. braut. Hann átti síðan tvö góð högg á 18. holu og þurfti að setja niður um 15 metra pútt fyrir erni og nýju vallarmeti en tvípúttaði og jafnaði þannig vallarmetið.
Margir kylfingar eru að leika mun betur í dag en fyrstu tvo dagana en aðstæður eru mjög góðar, lítill vindur og völlurinn aðeins blautur eftir rigningu í nótt.
