Todd og Day í forystu á fyrsta risamóti ársins
Á fimmtudaginn fór fram fyrsti hringurinn á PGA meistaramótinu sem er fyrsta risamót ársins í ár.
Ástralinn Jason Day og Bandaríkjamaðurinn Brendon Todd deila forystunni á 5 höggum undir pari en leikið er á hinum skemmtilega TPC Harding Park velli.
Day sigraði á PGA meistaramótinu árið 2015 en Todd hefur ekki enn unnið risamót.
Höggi á eftir þeim Day og Todd eru Scottie Scheffler, Martin Kaymer, Xander Schauffele, Bud Cauley, Zach Johnson, Brooks Koepka, Justin Rose, Brendan Steele og Mike Lorenzo-Vera. Koepka hefur auðvitað titil að verja í mótinu en hann hefur unnið PGA meistaramótið tvö ár í röð.
Tiger Woods byrjaði vel og er jafn í 20. sæti á 2 höggum undir pari. Af öðrum þekktum kylfingum má nefna að Rory McIlroy lék á parinu, Justin Thomas lék á höggi yfir pari, Jordan Spieth lék á 3 höggum yfir pari og Phil Mickelson lék á 2 höggum yfir pari.
Annar hringur mótsins fer fram í dag. Hér er hægt að sjá stöðuna.