Valdís lék lokahringinn á 75 höggum
Atvinnukylfingurinn Valdís Þóra Jónsdóttir, GL, lék í nótt lokahringinn á Ladies European Thailand meistaramótinu á 75 höggum eða þremur höggum yfir pari. Samtals lék Valdís hringina fjóra í mótinu á 5 höggum yfir pari og endaði í 54. sæti.
Valdís, sem lék með heimakonunum Phudthipinij og Utama á lokahringnum, byrjaði illa og lék fyrstu holuna á 8 höggum. Næstu 17 holur lék hún á höggi undir pari en hún fékk þrjá fugla og tvo skolla á þeim kafla.
Stigalisti mótaraðarinnar hefur nú þegar verið uppfærður eftir mót helgarinnar. Valdís situr nú í 65. sæti eftir 10 mót en hún var í 67. sæti fyrir mótið í Taílandi.
Áhugakylfingurinn Atthaya Thitikul stóð uppi sem sigurvegari í mótinu á 22 höggum undir pari, fimm höggum á undan Esther Heinseleit sem endaði önnur.
