Mótaskrá Evrópumótaraðar kvenna hefur að geyma hæsta verðlaunafé í sögu mótaraðarinnar

Undanfarin ár hafa reynst Evrópumótröð kvenna (LET) erfið bæði hvað varðar fjölda móta og verðlaunafé sem í boði hefur verið. Seint á síðasta ári var greint frá því að LET og LPGA mótaröðin myndu ganga í samstarf með það markmið að endurvekja áhugann á LET. Á þeim tímapunkti var ekki farið nánar út í hvernig breytingar mætti búast við en Mike Whan, stjórnandi LPGA mótaraðarinnar sagði að markmiðið yrði að gera mótaröðina eins sterka og mögulegt væri.

Nú hefur mótaskrá ársins 2020 verið birt og eru svo sannarlega miklar breytingar í vændum fyrir þá kylfinga sem leika á Evrópumótaröð kvenna. Á nýrri mótaröð verða mörg met bætt og mun fjöldi móta fjölga til muna, þá aðallega mótum sem eru leikin í Evrópu.

• Heildar verðlaunafé fyrir tímabilið 2020 er nálægt 18 milljónum evra sem er nýtt met
• 24 mót, þar af eru 15 í Evrópu
• Sjö ný mót og mótum með verðlaunafé yfir 500.000 evrur fjölgar um sjö
• Hæsta verðlaunafé í almennu móti (risamót ekki talin með): 1 milljón dollara í Sádi-Arabíu; 1,5 milljón evra í móti sem haldið er með Evrópumótaröð karla í Svíþjóð og 1,1 milljón dollara í móti sem er ekki komið með staðsetningu.
• Nýr stigalisti, Race to Costa del Sol, mun bjóða upp á hæstu bónusgreiðslur í sögu mótaraðarinnar

Ljóst er að áhrifa LPGA mótarðarinnar er nú þegar farið að gæta ef marka má nýja mótaskrá og ljóst að fleiri af bestu kylfingum heims munu sækja í mót á vegum LET.

Tveir íslenskir atvinnumenn eru með þátttökurétt á mótaröðinni en Guðrún Brá Björgvinsdóttir vann sér inn þátttökurétt á mótaröðinni um helgina og Valdís Þóra Jónsdóttir hefur keppt á mótaröðinni undanfarin ár. Það eru því spennandi tímar framundan fyrir kylfinga mótaraðarinnar.

Mótaskrá ársins 2020 og verðlaunfé í mótunum má sjá hér að neðan: