Ólafía Þórunn um miðjan hóp fyrir lokahringinn í Hollandi
Ólafía Þórunn Kristinsdóttir úr GR er á 3 höggum yfir pari fyrir lokahringinn á Big Green Egg Open í Hollandi en mótið er hluti af Evrópumótaröðinni. Ólafía Þórunn lék þriðja hringinn í gær á 71 höggi eða á 1 höggi undir pari Rosendaelsche vallarins. Okkar kona lék einnig vel á fyrsta hring eða á 2 höggum undir pari en henni fataðist aðeins flugið á öðrum hringnum er hún kom í hús á 6 höggum yfir pari.
Þetta er fjórða mót Ólafíu Þórunnar síðan hún hóf endurkomu sína á keppnissviðið eftir að hafa borið sitt fyrsta barn undir belti. Henni tókst ekki að komast í gegnum niðurskurðinn í hinum mótunum þremur.
Anna Nordqvist frá Svíþjóð er með eins höggs forskot á þær Vani Kapoor frá Indandi og Sarah Schober frá Austurríki fyrir lokahringinn.
Ólafía Þórunn verður ræst út á lokahringinn klukkan hálfníu í dag á íslenskum tíma.