Besti árangur Guðmundar á Áskorendamótaröðinni
Guðmundur Ágúst Kristjánsson og Birgir Leifur Hafþórsson léku í dag lokahringinn á Opna Bretagne mótinu sem er hluti af Áskorendamótaröðinni og fór fram í Frakklandi. Guðmundur náði sínum besta árangri á mótaröðinni á meðan Birgi fataðist aðeins flugið.
Strákarnir voru jafnir eftir fyrsta, annan og þriðja hring mótsins og fengu því að leika saman í holli í dag þegar lokahringurinn fór fram. Heimildir Kylfings herma að þetta sé í fyrsta skiptið í sögunni sem íslenskir kylfingar leika saman í holli á Áskorendamótaröðinni.
Svo fór að Guðmundur lék betur á lokahringnum, fékk fimm fugla og þrjá skolla á hringnum og kom inn á 2 höggum undir pari.
Guðmundur lék hringi mótsins samtals á 4 höggum undir pari og er þessa stundina jafn í 15. sæti. Besti árangur Guðmundar fyrir mótið var 51. sæti á Slovakia Challenge mótinu í júlí.
Birgir Leifur spilaði lokahringinn á tveimur höggum yfir pari og endaði mótið á parinu í heildina. Birgir, sem sigraði á þessu móti árið 2017, er þessa stundina jafn í 30. sæti og fær fyrir það sín fyrstu stig á stigalistanum þetta árið.
Sebastian Heisele er með tveggja högga forystu í mótinu þegar fimm holur eru eftir. Hann er í leit að sínum fyrsta titli á mótaröðinni.
