Besti árangur kvennalandsliðsins frá upphafi

Íslenska kvennalandsliðið í golfi tapaði 3-0 gegn Spánverjum í leik um 7. sætið í dag á Evrópumóti áhugakylfinga í Svíþjóð. Ísland endaði því í 8. sæti sem er langbesti árangur Íslands frá upphafi samkvæmt heimasíðu Golfsambands Íslands.

Íslenska liðið var skipað eftirfarandi leikmönnum: Heiðrún Anna Hlynsdóttir, Saga Traustadóttir, Andrea Bergsdóttir og Hulda Clara Gestsdóttir. Gregor Brodie afreksstjóri GSÍ var liðsstjóri.

Í leik dagsins töpuðu Saga Traustadóttir og Andrea Bergsdóttir 2/1 í fjórmenningsleiknum, Hulda Clara Gestsdóttir tapaði 4/2 og Heiðrún Anna Hlynsdóttir tapaði 6/5.

Heimakonur í Svíþjóð fögnuðu sigri eftir úrslitaleik gegn Þjóðverjum.

Lokastaðan:

1. Svíþjóð
2. Þýskaland
3. Danmörk
4. Sviss
5. Ítalía
6. Frakkland
7. Spánn
8. Ísland
9. Tékkland
10. Holland
11. Belgía
12. Slóvakía