Evrópumótaröð karla: Fjórir jafnir í Skotlandi
Fyrsti dagur Aberdeen Standard Investments Scottish Open mótsins var leikinn í dag en leikið er á Renaisance vellinum. Fjórir kylfingar eru jafnir á eftir daginn á átta höggum undir pari. Skor voru með eindæmum góð í dag en samtals léku 136 af 156 kylfingum á pari eða betur.
Kylfingarnir sem léku á 63 höggum, eða átt höggum undir pari, eru þeir Romain Wattel, Nino Bertasio, Matt Kuchar og Edoardo Molinari. Helst ber að nefna að bæði Kuchar og Molinari fengu tvo erni á sínum hring. Bertasio var einn af þeim fjórum sem tapaði ekki höggi á hringnum en hann fékk átt fugla og restina pör.
Sjö kylfingar eru jafnir í fimmta sæti á sjö höggum undir pari. Þar á meðal eru þeir Thomas Pieters og Erik Van Rooyen en hann hefur leikið vel undanfarnar vikur.
Justin Thomas og Rory McIlroy eru báðir á meðal keppenda. Þeir byrjuðu nokkuð vel og kom í hús á 67 höggum og eru þeir jafnir í 29. sæti.
