Framkvæmdir að hefjast við 16. holu Hvaleyrarvallar

Fram kemur í tilkynningu frá Golfklúbbi Keilis að í dag, fimmtudag, breytist 16. holan á Hvaleyrarvelli þannig að leikið verður upp á gömlu 16. flötina (gömlu par 3 holuna).

Vallarstarfsmenn hafa undanfarna daga verið að slá brautina fyrir ofan og koma glompum í leik aftur. Fyllt hefur verið í glompurnar þannig að mun auðveldara verður að leika úr þeim. Flötin er komin í sama stand og aðrar flatir á vellinum og vona vallarstarfsmenn að þetta verði skemmtileg tilbreyting á vellinum.

Jarðvinna er áætluð að taki um 3-4 vikur og ræktunartími um 11-13 mánuði. Þá verður 16. brautin öll sléttuð og gerð fín þannig að klúbbmeðlimir losna við litla hóla sem hafa verið á seinni parti brautarinnar. Fyrri parturinn var sléttaður fyrir um 10 árum síðan.

Á mynd hér fyrir neðan má sjá betur hvernig brautin verður leikin og áætlun á útliti á flöt og umhverfi.