Guðmundur komst inn á lokamót Áskorendamótaraðarinnar
Lokamót Áskorendamótaraðarinnar í golfi fer fram á T-Golf & Country Club á Majorka dagana 19.-22. nóvember næstkomandi. Einn Íslendingur er á meðal þeirra 45 sem spila um 350.000 evrur sem og þátttökurétt á Evrópumótaröð karla.
Guðmundur Ágúst Kristjánsson GR komst inn í mótið en hann var í 46. sæti á stigalista mótaraðarinnar og þurfti því einungis að treysta á að einn kylfingur myndi afboða þátttöku sína sem svo gerðist.
Allir 45 kylfingar mótsins munu spila fjóra hringi og verður því ekki niðurskurður eftir tvo hringi eins og venjan er á mótaröðinni. Undanfarin ár hafa 15-20 efstu kylfingarnir á mótaröðinni fengið þátttökurétt á Evrópumótaröðinni að fjórum hringjum loknum en svo verður ekki í ár.
Þess í stað fá einungis fimm efstu kylfingarnir á peningalistanum takmarkaðan þátttökurétt en þetta staðfesti Guðmundur í samtali við blaðamann Kylfings.
„Venjulega væri ég kominn með takmarkaðan þátttökurétt á Evrópumótaröðinni bara fyrir það að hafa komist hingað en það eru víst fimm sæti í boði fyrir þá sem enda efstir á peningalistanum,“ sagði Guðmundur og bætti við að í vor hefði verið ákveðið að allir myndu halda sínum þátttökurétti á Áskorendamótaröðinni út 2021 sama hvernig þetta ár færi.
Þetta er aðeins í annað skiptið sem íslenskur kylfingur kemst inn á lokamót Áskorendamótaraðarinnar en áður hafði Birgir Leifur Hafþórsson afrekað það þegar hann endaði í 37. sæti á stigalistanum.
Haraldur Franklín Magnús hefur einnig verið með þátttökurétt á Áskorendamótaröðinni í ár en hann komst ekki inn í lokamótið þar sem hann var í 85. sæti á stigalistanum eftir mót síðustu viku.
