Guðrún Birna og Einar klúbbmeistarar Álftaness

Golfklúbbur Álftaness hélt meistaramót sitt á dögunum og tókst það einstaklega vel þar sem veðurguðirnir léku við hvurn sinn fingur. Mótinu var slitið með veglegu lokahófi í golfskálanum á Álftanesi þar sem þeir sem stóðu sig best voru verðlaunaðir. Klúbbmeistarar voru þau Guðrún Birna Snæþórsdóttir og Einar Georgsson.

Þegar úrslit mótsins eru skoðuð inn á Golfboxinu kemur í ljós að fyrst er getið sigurvegara þegar búið er að taka tillit til forgjafar. Þannig varð Páll Pálsson hlutskarpastur, spilaði á 185 höggum nettó en sigurvegarinn í höggleik án forgjafar, Einar Georgsson var í þriðja sæti á 193 höggum. Hjá konum varð Eyrún Sigurjónsdóttir sigurvegari nettó, lék á 186 höggum, einu betur en sigurvegarinn í höggleik án forgjafar, Guðrún Birna Snæþórsdóttir.

Hins vegar er það alltaf þannig að klúbbmeistari er sá kylfingur sem leikur á fæstum höggum. Í ár voru það Guðrún Birna Snæþórsdóttir og Einar Georgsson.

Þrír efstu hjá konum:

Guðrún Birna Snæþórsdóttir 181 högg

Eyrún Sigurjónsdóttir 228 högg

Sonja Björk Jónsdóttir 243 högg

Þrír efstu hjá körlum:

Einar Georgsson 208 högg

Veigar Örn Þórarinsson 210 högg

Kristófer Roman Kolbeins 212 högg

Meistaramót Golfklúbbs Álftanes - úrslit