Heimslisti karla: Bezuidenhout aftur á meðal 50 efstu
Suður-Afríski kylfingurinn Christiaan Bezuidenhout fagnaði sínum öðrum titli á Evrópumótaröðinni um helgina þegar hann sigraði á Alfred Dunhill meistaramótinu.
Bezuidenhout byrjaði lokadaginn þremur höggum frá forystunni en spilaði á 69 höggum og endaði á 14 höggum undir pari, fjórum höggum á undan næstu kylfingum.
Með sigrinum hækkar Bezuidenhout upp í 41. sæti á heimslista karla í golfi en fyrir helgi var hann í 61. sæti. Með þeim árangri tryggði hann nánast þátttökuréttinn sinn á Masters mótinu á næsta ári en 50 efstu á heimslistanum í lok ársins eru á meðal þeirra sem komast í mótið.
„Ég er mjög ánægður að hafa klárað þetta,“ sagði Bezuidenhout þegar sigurinn var í höfn. „Leopard Creek hefur alltaf verið sérstakur staður fyrir mér og völlurinn var frábær þessa vikuna. Þetta gerist ekki mikið betra. Mig hefur alltaf langað að vinna hér.“