Hola í höggi á fyrsta Mustad-texas móti Golfklúbbs Grindavíkur
Hefð fyrir texas-móti á Sjóaranum síkáta í Grindavík, mótið er komið til að vera segir eigandi Mustad á Íslandi, Sigurður Óli Þórleifsson.
Hefð er fyrir Texas scramble móti á laugardegi um Sjómannahelgina í Grindavík en sökum jarðhræringanna var ekkert slíkt mót haldið í fyrra. Félagarnir hjá Mustad audioline á Íslandi, eigandinn Sigurður Óli Þórleifsson og starfsmaður hans, Haukur Guðberg Einarsson, ákváðu að nýta tækifærið og var blásið til leiks á laugardaginn í blíðunni í Grindavík.
Sigurvegarar urðu Ástþór Arnar Ástþórsson og Guðmundur Valur Sigurðsson en mesta athygli vakti draumahögg kylfingsins Jóns Gauta Dagbjartssonar. Ekki nóg með að Gauti hafi farið holu í höggi, heldur var þetta í annað skipti á golfferlinum sem hann nær þessu afreki sem alla kylfinga dreymir um. Tekið skal skýrt fram að Jón Gauti er alls ekki góður kylfingur, er með u.þ.b. 20 í forgjöf.
Í spilaranum er viðtal við eiganda Mustad, Sigurð Óla, og herra Hole In One, Jón Gauta.
