Jólagjöf kylfingsins – Batman golfbíll með diskabremsum
Það eru eflaust margir að velta jólagjöfunum fyrir sér þessa dagana og margir kylfingar með eitthvað golftengt á óskalistanum. Það er óvíst að einhver hér á Íslandi nái að koma þessum stórkostlega golfbíl til landsins í tæka tíð fyrir Aðfangadag en hann er falur fyrir rúmlega 2 milljónir kr.
Fyrir aðdáendur ofurhetjunnar Batman þá er eflaust hægt að finna eitthvað sem tengist golfi en er ekki eins stórt í sniðum. Þessi Batmangolfbíll var seldur á uppboðsvefnum E-bay fyrir rétt rúmlega 2 milljónir kr.
Bíllinn er sérsmíðaður og er fyrirmyndin bíll ofurhetjunnar í myndinni Dark Knight. Bíllinn nær 60 km hraða á klst sem er eflaust ólöglegt á flestum golfvöllum. Það eru sex hjólbarðar á undratækinu, diskabremsur, Ipad, glasahaldari og myndir af Batman. Ekki kemur fram hvort það sé rými fyrir tvö golfsett á bílnum sem er eitt af lykilatriðum á golfbílum.
