Lægsta meðalskorið á PGA mótaröðinni í 18 ár
Aðdáendur PGA mótaraðarinnar eru vanir að sjá lág skor á mótaröðinni en tölur laugardagsins á Sony Open voru lægri en vanalega.
Þriðji keppnisdagur mótsins fór fram á laugardaginn á Wailalae golfvellinum og var meðalskor keppenda 66,66 högg. Aðstæður voru góðar en það rigndi vel um föstudagsnóttina sem gerði flatirnar þægilegri fyrir keppendur.
Um er að ræða lægsta meðalskor á PGA mótaröðinni frá árinu 2003 þegar keppendur Bob Hope Chrysler Classic mótsins spiluðu þriðja hring mótsins að meðaltali á 66,28 höggum.
Líkt og Kylfingur hefur greint frá er Brendan Steele með tveggja högga forystu fyrir lokahringinn á 18 höggum undir pari. Tveimur höggum á eftir honum eru Kevin Na, sem lék á 61 höggi á laugardaginn, og Joaquin Niemann.