Myndband: Spieth sló í holu af 146 metra færi
Bandaríkjamaðurinn Jordan Spieth er með tveggja högga forystu fyrir lokahringinn á AT&T Pebble Beach Pro-Am mótinu sem fer fram á PGA mótaröðinni í golfi.
Spieth leiddi eftir tvo hringi en var búinn að kasta frá sér forystunni eftir þrjá skolla á seinni níu á þriðja hring. Hann átti hins vegar högg dagsins á 16. holu þegar hann sló beint í holu af 146 metra færi fyrir erni.
Á þeim tímapunkti jafnaði hann Daniel Berger í forystu en Berger fékk svo tvöfaldan skolla á 18. holu og því verður Spieth með tveggja högga forystu þegar lokahringur mótsins fer fram í dag.
