PGA: Þrír jafnir á toppnum
Bandaríkjamennirnir Peter Malnati og Jason Kokrak deila forystunni ásamt Joaquin Niemann frá Síle á Sony Open sem hófst á fimmtudaginn á PGA mótaröðinni.
Kylfingarnir þrír léku allir á 8 höggum undir pari og eru tveimur höggum á undan næstu kylfingum.
Niemann hefur verið sérstaklega heitur undanfarnar vikur en hann tapaði í bráðabana um sigur á fyrsta móti ársins og hefur nú fengið 39 fugla á síðustu 90 holum.
Tveimur höggum á eftir Malnati, Kokrak og Niemann eru sex kylfingar á 6 höggum undir pari. Annar hringur mótsins fer fram í dag.
Sigurvegari síðasta árs, Cameron Smith, byrjaði ágætlega í mótinu og er á 3 höggum undir pari eftir fyrsta hring. Hann deilir 40. sæti ásamt 13 öðrum kylfingum.
Hér er hægt að sjá stöðuna í mótinu.
Fréttir
Mest lesið á kylfingur.is
