PGA: Tveir jafnir á toppnum eftir fyrsta hring
Fyrsti hringur á Waste Management Phoenix Open mótinu var leikinn í gær en mótið er hluti af PGA mótaröðinni og fer fram í Arizona í Bandaríkjunum. Efstu sætin eru þétt setin af heimamönnum og deila tveir þeirra efsta sætinu.
Matthew NeSmith er annar þeirra en hann lék hringinn í gær á 8 höggum undir pari. Hann tapaði ekki höggi í gær en fékk einn örn og sex fugla. Jafn honum í efsta sætinu er Mark Hubbard sem tapaði heldur ekki höggi en fékk 8 fugla á hringnum.
Tveir kylfingar eru svo jafnir í 3. sæti á 7 höggum undir pari, einu höggi á eftir efstu mönnum. Það eru þeir Nate Lashley og Sam Burns.
Aðeins eru 5000 áhorfendur leyfðir á vellinum á meðan mótinu stendur en það er þó mesti leyfði áhorfendafjöldi á PGA móti frá því að COVID faraldurinn hófst. Keppendur taka vissulega eftir fækkun áhorfenda eins og NeSmith minntist á.
„Ég náði örugglega þöglustu næstum holu í höggi á 16. holunni. Það voru kannski sex manns sem klöppuðu en ég sló svona 10 sentímetra frá holunni".
