PGA: Watney með kórónuveiruna og hættur keppni
Bandaríkjamaðurinn Nick Watney þurfti í dag að hætta keppni á RBC Heritage mótinu sem fer fram á PGA mótaröðinni í golfi en ástæðan er sú að hann er með kórónuveiruna.
Watney hafði leikið fyrsta hring mótsins á 3 höggum yfir pari en hann fékk niðurstöðu úr skimun stuttu fyrir annan hringinn og fór því rakleiðis af æfingasvæðinu.
Watney spilaði með þeim Vaughn Taylor og Luke List á fyrsta hringnum. „Ég frétti þetta eftir níu holur,“ sagði Taylor. „Ég var í smá sjokki ef ég á að vera hreinskilinn. Hjartað sló aðeins hraðar og ég varð aðeins stressaður. Vonandi líður Nick vel og kemst í gegnum þetta.“
Þrátt fyrir umrætt smit fór annar hringur RBC Heritage mótsins fram með venjulegum hætti í dag áður en fresta þurfti leik vegna veðurs.
