Sigurður Arnar fékk tæpar 3 milljónir fyrir sigurinn
Sigurður Arnar Garðarsson, kylfingur í Golfklúbbi Kópavogs og Garðarbæjar gerði sér lítið fyrir og sigraði á móti á Next Golf Tour mótaröðinni sem lauk í gær. Sigurður fékk að launum um 2,7 milljónir króna fyrir sigurinn og til viðbótar fékk hann um 70 þúsund krónur fyrir að vera með þriðja lengsta drævið í mótinu en það var 337 metrar.
Í frétt GKG kemur fram að veglegt verðlaunafé sé í mótunum sem eru á vegum TrackMan. Í þessu móti sem Sigurður sigraði í var verðlaunafé rúmar 20 milljónir króna.
Þetta mun vera eitt stærsta verðlaunafé sem íslenskur atvinnukylfingur hefur unnið í einu móti en Sigurður stefnir á frekari landvinninga í atvinnumennsku.