Örninn 2026
Örninn 2026

Fréttir

Stewart Cink sló tekjumet og tryggði sér tvöfaldan sigur á PGA öldungatúrnum
Mánudagur 16. nóvember 2026 kl. 21:27

Stewart Cink sló tekjumet og tryggði sér tvöfaldan sigur á PGA öldungatúrnum

Bandaríkjamaðurinn Stewart Cink lauk keppnistímabilinu á PGA Tour Champions með glæsibrag þegar hann sigraði á Charles Schwab Cup Championship í Phoenix í Arizona um helgina. Með sigrinum tryggði hann sér jafnframt efsta sætið í stigakeppni mótaraðarinnar annað árið í röð og varð fyrstur kylfinga til að vinna sér inn meira en fjórar milljónir Bandaríkjadala á einu keppnistímabili á öldungamótaröðinni.

Cink, sem er 53 ára, lék hringina fjóra á 19 höggum undir pari, 265 höggum, og sigraði með tveggja högga mun á Zach Johnson. Þeir tveir hafa verið í sérflokki á mótaröðinni á þessu ári og unnu hvor um sig sex mót.

Cink hafði þriggja högga forskot fyrir lokahringinn en Johnson sótti hart að honum og minnkaði muninn í eitt högg eftir fugl á tíundu holu. Cink svaraði með fuglum á 14. og 16. holu og tryggði sér sigurinn með því að leika lokahringinn á 69 höggum, tveimur undir pari. Johnson lék skollalausan hring á 68 höggum.

Rory Sabbatini, Retief Goosen og Freddie Jacobson deildu þriðja sætinu á 14 höggum undir pari.

Fyrstur yfir fjórar milljónir dala

Cink fékk 528 þúsund Bandaríkjadali fyrir sigurinn í Phoenix og lauk keppnistímabilinu með samtals 4.399.265 dali, rúmlega hálfan milljarð króna, í verðlaunafé úr 21 móti. Það er nýtt met á PGA Tour Champions, sem er ætluð kylfingum 50 ára og eldri.

Þá hlaut hann eina milljón dala í sérstakan sigurlaunasjóð Charles Schwab Cup stigakeppninnar. Johnson varð annar í stigakeppninni og fékk 500 þúsund dali, en Steven Alker hafnaði í þriðja sæti og fékk 300 þúsund dali.

Cink hóf tímabilið með sigri á Mitsubishi Electric Championship á Havaí í janúar og lauk því með sigri í Phoenix. Hann var í efsta sæti stigakeppninnar allt tímabilið og er nú í hópi þeirra Tom Lehman og Bernhard Langer sem hafa unnið Charles Schwab Cup tvö ár í röð.

Cink, sem sigraði á Opna breska meistaramótinu árið 2009 eftir bráðabana gegn Tom Watson, hefur nú fest sig í sessi sem einn öflugasti kylfingur öldungamótaraðarinnar.