Úrtökumótin: Fór holu í höggi í 9. skiptið
Lokaúrtökumótið fyrir Evrópumótaröð karla fer fram um þessar mundir á Lumine golfsvæðinu á Spáni.
Á öðrum hringnum mátti heyra mikil fagnaðarlæti á Lakes vellinum þegar Nýsjálendingurinn Josh Geary gerði sér lítið fyrir og fór holu í höggi á 7. holu vallarins.
Sigurður Elvar Þórólfsson hjá Golfsambandinu var einn af þeim fyrstu á svæðið og náði mynd af kappanum sem var að vonum ánægður með höggið.
Geary tjáði Sigurði að þetta væri í níunda skiptið sem hann færi holu í höggi. Eftir tvo hringi í mótinu er Geary jafn í 65. sæti á höggi undir pari.