Valdís jöfn í 67. sæti þegar úrtökumótið er hálfnað
Valdís Þóra Jónsdóttir GL er jöfn í 67. sæti eftir tvo hringi á úrtökumóti fyrir LPGA mótaröðina. Um er að ræða fyrsta stig úrtökumótanna af þremur.
Eftir tvo hringi í mótinu er Valdís á höggi yfir pari í heildina en skorkort hennar má sjá hér fyrir neðan.
Eins og sést hefur Valdís leikið frekar stöðugt golf til þessa en hún hefur einungis fengið fimm skolla og fjóra fugla á fyrstu 36 holunum.
Leikið er á þremur völlum í mótinu og verður skorið niður eftir þrjá hringi. Þeir kylfingar sem halda áfram í gegnum niðurskurðinn leika svo fjórða hringinn á sunnudaginn og berjast þá um að minnsta kosti 60 laus sæti á næsta stig.
Vellirnir sem keppt er á eru Palmer og Dinah Shore vellirnir hjá Mission Hills golfklúbbnum og Faldo völlurinn hjá Shadow Ridge golfklúbbnum en þeir eru allir staðsettir í Kaliforníu. Valdís hefur spilað fyrstu tvo hringina á Dinah og Palmer vellinum og leikur á Faldo vellinum í dag.