Valdís Þóra keppir í Taílandi á Evrópumótaröðinni
Atvinnukylfingurinn Valdís Þóra Jónsdóttir, GL, hefur leik snemma á fimmtudaginn á Ladies European Thailand meistaramótinu sem er hluti af Evrópumótaröð kvenna í golfi.
Fyrir mótið er Valdís í 67. sæti á stigalista mótaraðarinnar eftir 9 mót á tímabilinu. Meðalskor hennar er 73,95 högg sem er 71. besti árangur allra á mótaröðinni.
Valdís hefur leik klukkan 12:50 að staðartíma á 10. teig eða klukkan 5:50 að íslenskum tíma. Hún verður í holli með þeim Sian Evans frá Englandi og heimakonunni Mookharin Ladgratok.
Alls eru leiknir fjórir hringir í mótinu sem lýkur á sunnudaginn.