Valdís Þóra lék fyrsta hringinn í Taílandi á pari
Valdís Þóra Jónsdóttir, GL, lék í dag fyrsta hringinn á Ladies European Thailand meistaramótinu á 72 höggum eða á pari vallarins. Mótið er hluti af Evrópumótaröð kvenna.
Á hring dagsins fékk Valdís þrjá skolla og þrjá fugla en hún hóf leik á 10. teig og var í holli með Sian Evans frá Englandi (+5) og heimakonunni Mookharin Ladgratok (+4).
Eftir fyrsta keppnisdaginn er Valdís Þóra jöfn í 26. sæti í mótinu, fimm höggum á eftir Linu Boqvist frá Svíþjóð.
Annar hringur mótsins fer fram í nótt, föstudag, og fer Valdís út klukkan 1:20 eftir miðnætti.