Valdís Þóra reynir við LPGA mótaröðina
Atvinnukylfingurinn Valdís Þóra Jónsdóttir mun spreyta sig í úrtökumóti fyrir LPGA mótaröðina sem fer fram dagana 13.-18. október á Plantation golfvellinum í Flórída.
Um er að ræða 2. stigs úrtökumót en Valdís komst beint inn í það mót og slapp við fyrsta stigið sem fram fór í ágúst.
Samkvæmt golf.is er Valdís nú þegar mætt til Bandaríkjanna til að undirbúa sig og verður hún þar fram að úrtökumótinu.
Takist Valdísi að enda í einu af 15-25 efstu sætunum í úrtökumótinu kemst hún í lokaúrtökumótið þar sem 45 kylfingar öðlast þátttökurétt á LPGA mótaröðinni fyrir tímabilið 2019.
Undanfarin ár hefur Valdís Þóra einbeitt sér að LET mótaröðinni í Evrópu með fínum árangri. Í ár er hún í 27. sæti stigalistans og því örugg með sæti á mótaröðinni á næsta ári. LPGA mótaröðin er hins vegar stærsta mótaröð heims og er verðlaunafé mótanna töluvert hærra en í Evrópu.