Fréttir

Veðurguðir trufla Íslandsmótið - klárast mótið í þriðja hring?
Veðrið hefur verið mjög gott fyrstu tvo keppnisdagana í Eyjum.
Páll Ketilsson
Páll Ketilsson skrifar
laugardaginn 6. ágúst 2022 kl. 09:00

Veðurguðir trufla Íslandsmótið - klárast mótið í þriðja hring?

Svo gæti farið að þriðji hringurinn á Íslandsmótinu í Eyjum verði lokahringur mótsins. Veðurspá fyrir lokadaginn, sunnudag er mjög slæm þar sem von er á mikilli rigningu og miklum vindi og ekki víst að það verði leikhæft á golfvellinum í Herjólfsdal.

Í tölvupósti til keppenda kemur fram að svo gæti farið að aflýsa þurfi fjórða keppnisdegi en sú ákvörðun mun liggja fyrir í síðasta lagi á hádegi á sunnudag.

„Eins og flestir vita er veðurspáin fyrir sunnudag slæm. Mótsstjórn hefur fylgst með spánni og mun gera það áfram. Stefnt er að því að fjórða umferðin verði leikin á sunnudag. Verði ekki hægt að leika á sunnudag verður fjórðu umferðinni aflýst, leik verður ekki frestað fram á mánudag. Mótsstjórn þykir eðlilegt að keppendum sé þetta ljóst fyrir þriðju umferð á morgun. 

Gert er ráð fyrir að rástímar fyrir fjórðu umferð verði gefnir út að leik loknum á morgun. Þurfi að aflýsa fjórðu umferð mun sú ákvörðun liggja fyrir í síðasta lagi á hádegi á sunnudag. Þriðja umferð verður því leikin samkvæmt áður auglýstri áætlun. Ræst verður frá kl. 08:00 og síðasti ráshópur ræstur kl. 13:10. Sjónvarpsútsending verður frá 15:00 til 17:50 og er afar mikilvægt að leikhraðaáætlun standist,“ segir í tilkynningu til keppenda.

Heimamenn sem kylfingur.is ræddi við segja að skap veðurguðanna lagist oft eins og gerðist á Þjóðhátíð um síðustu helgi. Þá raungerðist spáin ekki, veður var miklu betra en spár gerðu ráð fyrir. Veður er breytilegt á Íslandi.